Naye EPFO (Employees’ Provident Fund Organisation) rule ke mutabiq, ab koi vyakti chahe sirf ek mahina hi job kare, lekin agar usne EPS (Employees’ Pension Scheme) mein contribution diya hai, toh wo EPS pension ke liye eligible hoga. Matlab, ab pension milne ka haq poore saal ki service ke bajay, contribution ke basis par tay hoga.
EPFO ka yeh faisla un sectors ke liye badi rahat lekar aaya hai jahan short-term jobs di jaati hain — jaise BPO, logistics, contract staffing aur short-term projects. In sectors mein har saal hazaaron log sirf kuch mahine kaam karne ke baad fire kar diye jaate hain. Finance aur sales se judi jobs bhi kuch isi tarah ki hoti hain.
Pehle, aise sectors mein 6 mahine se kam kaam karne wale log EPS contribution dene ke bawajood bhi pension ke haq se vanchit reh jaate the. Unka EPS contribution bhi waste ho jaata tha. Lekin yeh naya rule yuvaon aur irregular workforce ke liye ek badi rahat ke roop mein aaya hai.
